பகவான் ஓஷோவை சாகடித்த அமெரிக்கா

"பகவான் ஓஷோவை சாகடித்த அமெரிக்கா" - தெய்வச்சிலை

இன்று இப்புத்தகத்தை வாசித்தேன்.

முதன்முதலில் எனக்கு ஓஷோவை அறிமுகப்படுத்தியது ராணுவத்தில் பணிபுரியும் எனது அத்தை மகன் வாசுதேவன் ரேணு.

அறிவும் தேடலும் எவ்வளவு சுகமான போதை என்பதை ஓஷோவின் கருத்துக்களில் உணர்ந்திருக்கிறேன். தியானம், ஆன்மீகம், கடவுள் என்ற எல்லா பாழடைந்த கட்டிடங்களையும் குண்டுவைத்து தகர்த்தவர் ஓஷோ. ஓஷோவின் புத்தகங்களைப் படிப்பது என்பது எப்போதும் ஒரு அலாதியான உணர்வு. அவ்வப்போது என்னை முற்றுகையிடும் கவலைகளையும் மன அழுத்தத்தையும் விரட்டியடிக்க என் உதவிக்கு வரும் உறவுகளில் ஓஷோவும் ஒருவர். ஓஷோவைப் பகவானாக பார்க்க வைக்காமல் ஒரு தத்துவ ஆசிரியராகவே பார்க்க வைப்பவர் பெரியார்.

இப்புத்தகத்தைப் பற்றிப் பார்ப்போம்...

முன்னாள் அமெரிக்க அதிபர் ரொனால்ட் ரீகன் ஒரு கிறித்தவ மத வெறியர். நம் காலத்திலேயே இயேசு மீண்டும் உயிர் பெற்று வருவார்; சாத்தானுடன் இறுதிப்போரை நடத்துவார் என்றும் நம்பிக்கொண்டிருந்தவர். இவரது ஆட்சிக்காலத்தில் அதாவது 1981-ம் ஆண்டு அமெரிக்கா செல்கிறார் ஓஷோ. (1989-ம் ஆண்டுவரையில் ரொனால்ட் ரீகன்தான் அமெரிக்க அதிபராக இருந்தார்).

ஓஷோவைப் பற்றி உங்களுக்குத் தெரியும்தானே. இந்த நூற்றாண்டின் இணையற்ற இந்திய தத்துவ போதகர். புதிய சந்நியாசம் என்ற இவரது பாதையில் “யாரும் வெளி உலக வாழ்க்கையை துறக்க வேண்டியதில்லை, மாறாக ஒவ்வொரு தலைமுறையும் தன் அடுத்த தலைமுறையின்மேல் சுமத்தும் நம்பிக்கை அடிப்படையிலான கட்டுமான அமைப்பு முறையைத்தான் துறக்க வேண்டும்” என்றவர். “கடவுள் என்பது ஆதாரமற்ற வெறும் வார்த்தை; அது மதகுருமார்களின் கண்டுபிடிப்பு” என்றவர்.

ஓஷோவின் கருத்துக்கள் உலகை உலுக்கியது. குறிப்பாக மதத்தின் பெயரால் மக்களை மயக்கி தங்கள் சொந்த வாழ்க்கையை சுகபோகமாகய் நடத்திக்கொண்டிருந்த மதத் தலைவர்களின் மனங்களில் ஓஷோ வில்லனாகப் பதிந்தார். அமெரிக்க மக்களோ இவரது கருத்துக்களால் பெரிதும் ஈர்க்கப்பட்டார்கள். அமெரிக்காவின் வறண்ட நிலமான மத்திய ஓரேகானின் பகுதியில் 5000 பேர் தங்கும் அளவிலான “ரஜ்னீஷ்புரம்” என்ற குடியிருப்பு ஏற்படுத்தப்படுகிறது. வருடத்திற்கு 15,000 பேர் அங்கு வந்து கோடைக்காலத்தை கொண்டாடுகிறார்கள். ஊடகங்கள் இவரைக் கொண்டாடுகிறது. ஓஷோவும் அவரது ஆன்மீகக் குடியிருப்பும் பரபரப்பு செய்தியாக்கப்படுகிறது. அமெரிக்கத் தொலைக்காட்சிகளில் தோன்றி கிறித்தவ மற்றும் மதங்களுக்கு எதிராக பிரச்சாரம் செய்கிறார் ஓஷோ. இவரது பிரச்சாரம் கிறித்தவ மதப் பிரச்சாரகர்களை மிரளச் செய்கிறது. தீவிர கிறித்தவரான ரொனால்ட் ரீகன் சும்மா விடுவாரா? இப்படியே போனால் கிறித்தவம் என்னாவது என்று கவலைப்பட்ட (உலக ரவுடி) அமெரிக்க அதிகாரிகளின் விருப்பத்திற்கு ஏற்ப சில ரகசிய கட்டளைகள் பிறப்பிக்கப்படுகிறது. 

அவரைக் கொல்வது அல்லது நாடு கடத்துவது என்ற திட்டத்தின்படி 1985-ம் ஆண்டு அக்டோபர் 28-ம் தேதியன்று (28-10-1985) வடக்கு கரோலினா மாநிலத்திலுள்ள சார்லோட்டே எனும் இடத்தில், அமெரிக்க குடியேற்றச் சட்டத்தை மீறியதாக பொய்க் குற்றம் சுமத்தப்பட்டு கைது ஆணை இல்லாமல் துப்பாக்கி முனையில் “ஓஷோ” கைது செய்யப்படுகிறார். அது பொய்க்குற்றம் என்பது பின்னர் வழக்கில் நிரூபிக்கப்பட்டது. அமெரிக்காவிற்குள் நுழைந்ததுமே கைது செய்யாமல் இத்தனை ஆண்டுகள் கழித்து கைது செய்யும்போதே அது பொய் குற்றச்சாட்டு என்பது புரிகிறதுதானே. 

கைது செய்யப்பட்ட ஓஷோ எங்கே அடைக்கப்பட்டிருக்கிறார்? எப்போது விடுதலை செய்யப்படுவார்? என்ற எந்தத் தகவலும் அவரது வழக்கறிஞர்களுக்கு தெரிவிக்கப்படவில்லை. ரகசியமாக பல இடங்களில் அலைக்கழிப்படுகிறார். பின்னர் 08-11-1985 அன்று சிறையிலிருந்து முழுமையாக விடுவிக்கப்படுகிறார். அதன்பின்னர் ஒருவாரம் கழித்து 14-11-1985 அன்று அமெரிக்காவை விட்டு வெளியேற உத்தரவிடப்படுகிறார். பலநாடுகளிலும் அவருக்கு அனுமதி மறுக்கப்படுகிறது: எச்சரிக்கப்படுகிறது. இறுதியில் இந்தியா திரும்பி வருகிறார். 

அதுவரையில் திடகாத்திரமாக இருந்த அவரது உடல், அமெரிக்க கைதுக்குப் பின்னர் படிப்படியாக நலம் குன்றுகிறது. வேகமாக முடி கொட்டுகிறது. பிரசங்கம் செய்வதை நிறுத்துகிறார். சிறு சிறு தொற்று நோய்கள் அவரை பீடிக்க, உடல் நலக்குறைவால் இறுதியில் 1990 ஜனவரி 19-ம் நாள் மாலை 5 மணிக்கு இயற்கை எய்துகிறார்.

“தாளியம்” என்பது கண்ணாடி செய்வதற்குப் பயன்படுத்தப்படும் நீலச்சாம்பல் வண்ண உலோக மூலம். இது எலி விஷமாகப் பயன்படுத்தப்பட்டு வந்த ரசாயனம். இதை உணவில் கலந்தால் மெல்ல மெல்ல நரம்பு மண்டலம் பாதிக்கப்பட்டு மாதக்கணக்கில் மெதுவாக ஆட்களைக் கொல்லும். இந்த விஷம்தான் அமெரிக்கச் சிறையில் உணவுப் பொருளில் கலக்கப்பட்டு ஓஷோவுக்கு அளிக்கப்பட்டது. 

ஓஷோ மட்டுமல்ல, இந்த உலகில் வாழும் அல்லது இவ்வுலகில் நாளை பிறக்கப்போகும் ஒவ்வொரு குழந்தையுமே அமெரிக்க கொலையாளிகளுக்கு ஒரு பரிசோதனை எலிதான். "நான் ஆண்டஜாதி... மெஜாரிட்டி... உயர்ந்த இனம்... மயிரு... மண்ணாங்கட்டி..." எல்லாமே அறியாமைதான்.