கற்காலம் இங்கு முடியவில்லை

இவ்வளவு பேர்கள் படித்திருந்தும் வேட்பாளர்களின் தகுதியை ஆராயாமல் ஜாதியையும் பணத்தையும் பார்த்து இன்னமும் ஓட்டு போடும் மக்களைக் கொண்ட நாமெல்லாம், நம் நாட்டைப் பற்றி; முன்னோர்களைப் பற்றி அதீத பெருமையாகப் பேசிக்கொண்டு இன்னமும் மக்களை மயக்கத்திலேயே ஆழ்த்தி வைத்துக்கொண்டு நம்மை நாமே ஏமாற்றிக்கொள்ளக் கூடாது. பூனை கண்ணை மூடிக்கொண்ட பழமொழிக்கு ஒப்பானதுதான் இது.

அற சிந்தனையும் தனிநபர் ஒழுக்கமுமற்ற கூடாரமாக கிடக்கிறது இந்த புண்ணியநாடு (?...)

பன்றியை சாத்தானாகப் பார்க்கும்; மதச் சட்டங்கள் கடுமையாகப் பின்பற்றப்படும்
அரேபிய நாடுகளிலேயும்கூட பன்றிக்கறி விற்கவோ வாங்கவோ தடையில்லை. இங்கே மாட்டுக்கறி வைத்திருந்ததற்காகவும், கோயிலுக்குள் நுழைந்ததற்காகவும் மனிதன் அடித்துக் கொல்லப்படவும் எரிக்கப்படவும் உள்ளாகிறான். ஆட்பலமற்ற சிறுமிகள் தொடர்ந்து கற்பிழந்து உயிருமிழக்கிறார்கள்.

இங்கு இன்னும் கற்காலமே முடிந்தமாதிரி தெரியவில்லை. சந்தேகமேயில்லை, இது இன்னமும் பாம்பாட்டிகளின் தேசம்தான். பண்டாரங்களின் நாடுதான்.