பெரியாரும் தமிழ்த் தேசியமும் - சிற்றுளி வெளியீடு

தந்தை பெரியார் திராவிடர் கழக வடக்கு மண்டல அமைப்பாளர் தோழர் கரு.அண்ணாமலை அவர்கள் நேற்று இப்புத்தகத்தை படிக்கக் கொடுத்தார். "Save Tamils" என்ற பெயரில் இயங்கிக்கொண்டிருந்த தமிழ் இளைஞர்கள் தற்போது தங்கள் அமைப்பின் பெயரை "இளந்தமிழகம்" என்று பெயர் மாற்றம் செய்துள்ளனர். இவ்வமைப்பின் சார்பாக கடந்த செப்டம்பர் மாதம் தங்களின் "சிற்றுளி" பதிப்பகத்தின் வெளியீடாக இப்புத்தகத்தை வெளியிட்டுள்ளனர்.

50 ரூ விலைகொண்ட இச்சிறு புத்தகத்தில் செறிவான; தற்கால தமிழ்ச் சூழலுக்குத் தேவையான தெளிவான கருத்துக்கள் பதிவாகியுள்ளது.

தேசியம் என்றால் என்ன? எது உண்மையான தமிழ்த்தேசியமாக இருக்க வேண்டும்? பெரியார் தமிழ்த்தேசியத்தின் எதிரியா? வழிகாட்டியா? திராவிடம், தமிழ்த்தேசியத்திற்கு எதிரானது என்று கூறப்படுவது உண்மையா? தேசியங்களால் மக்களுக்கு ஆகப்போவது என்ன? தமிழகத்தின் இன்றைய உண்மையான நிலை, தமிழ்த்தேசியம் என்று பேசுபவர்களில் யார் சரியானவர்கள்? இனவாதம் / தமிழ்த்தேசியம் இரண்டிற்குமான வேறுபாடு என்று சகலவிதமான கேள்விகளும் தெளிவான கண்ணோட்டத்துடன் ஆய்வு செய்யப்பட்டுள்ளது.

அதில் இடம்பெற்றுள்ள கட்டுரைகள் :

01. திராவிடம் என்றாலும் தமிழ்த்தேசியம் என்றாலும் சாரத்தில் ஒன்றே - தோழர் தமிழேந்தி

02. பெரியாரின் செயல்வடிவத் தமிழ்த்தேசியம் - தோழர் கொளத்தூர் மணி

03. பெரியார்; விடுதலைச் சிந்தையின் விளைநிலம் - தோழர் தியாகு

04. சனநாயகத் தமிழ்த் தேசியம் - தோழர் செந்தில்

"இளந்தமிழகம்" அமைப்பின் ஒருங்கிணைப்பாளர் தோழர் செந்தில் அவர்களின் கட்டுரை மிக மிக செறிவான கருத்துக்கள் கொண்டது. தோழர் தியாகுவும் பெரியாரை சரியாக விமர்சனம் செய்துள்ளார். தமிழ்த்தேசியக் கண்ணோட்டத்தில் பெரியாரைப் புரிந்துகொள்ள தோழர் தமிழேந்தி, தோழர் கொளத்தூர் மணி ஆகியோரின் கட்டுரைகள் உதவுகிறது. மேலும், அலிகர் முஸ்லீம் பல்கலைக்கழகப் பேராசிரியர் து.மூர்த்தி அவர்களின் அணிந்துரை ஆழமான வரவேற்புரை.

தேசியம் என்பது மக்களை நவீனத்திற்கு அழைத்துச் செல்வதாக இருத்தல் வேண்டும். அது சொந்த மொழி பேசும் பிற்போக்கு சக்திகளுக்கு எதிராகவும் எழும்பக்கூடும். இனவுணர்வு அடிப்படையில் மட்டும் கட்டியமைக்கப்படும் தேசியம் சாமானிய உழைக்கும் மக்களுக்கானதல்ல. அது சமூகத்தை பின்னோக்கியே நகர்த்தும்.

ஜாதிதான் தமிழர்களின் அடையாளம் என்பதும், ஜாதிப் பெருமைகளே தமிழ்ச் சமூகத்தின் பெருமைகள் என்றும் வண்ணம் பூசும் ஏகப்பட்ட சிறு சிறு தமிழ் அமைப்புகள் தமிழகத்தை ஏனைய நவீன உலக சமூகத்திலிருந்து தனிமைப்படுத்தவே பயன்படும் என்பது இப்புத்தகத்தை படித்து முடிக்கையில் தெளிவாக உணர முடிகிறது.

"இனவாதம்" என்பதற்கும் "தமிழ்த்தேசியம்" என்பதற்குமான தெளிவான புரிதலை ஏற்படுத்திக்கொள்ள இப்புத்தகம் நிச்சயம் உங்களுக்கு உதவியாக இருக்கும்.

ஆகச்சிறந்த தெளிவான தொலைநோக்குப் பார்வைகொண்ட தமிழ் தலைமைகள் உருவாகவும், இத்தமிழ்ச் சமூகம் தழைத்து செழிக்கவும் இவ்வாறான புத்தகங்களை வாங்கிப் படித்து பலருக்கும் பகிர்வோமாக...!!!