உங்க கொள்கை என்ன ஜி?
30.07.2020
ஹிந்துக்களின் பாதுகாவலர்கள் நாங்கள்தான் என்று சொல்லிக்கொண்டு கந்த சஷ்டிக்கு மட்டும் நீலி அக்கறைகாட்டி நடித்து இடப்பங்கீடு விவகாரத்தில் பல லட்சம் ஹிந்து இளைஞர்களின் எதிர்காலத்திற்கு வேட்டு வைத்தது பார்ப்பனிய ஜனதா கட்சி. அவாள்களின் சூழ்ச்சி புரியாமல் பல இணைய அறிவாளிகளும் திமுக-வை சாடிக்கொண்டிருந்தார்கள். இன்றைக்கு அந்த திமுக-தான் பல லட்சம் பிற்படுத்தப்பட்ட ஹிந்து இளைஞர்களின் எதிர்காலத்தை போராடி பாதுகாத்துள்ளது.
மனிதன் கடவுளைப் படைக்கும் போது அவனுக்கு கடவுள் பற்றி நிறைய சந்தேகங்கள் எழுந்தன. கடவுள்தான் இந்தப் பெரிய தட்டையான உலகத்தை படைத்தாரா? அவர் ஒருவரே இத்தனையும் படைத்திருப்பாரா? என்றெல்லாம் சிந்தித்தான்.
ஆங்கிலேயர்கள் ஆட்சிக்காலத்தில் குழந்தைத் திருமணங்கள் அதிகம் நடந்துகொண்டிருந்தது. உறவின்போது பல சிறுமிகள் இறந்துபோயினர். இதனை தடுக்க 12 வயதுக்குட்பட்ட பெண்களுடன் உறவுகொண்டால் தண்டனை என்று சட்டம் கொண்டு வந்தது ஆங்கில அரசு.
"எல்லாத்துக்கும் திமுக-தான் காரணம். பல்லாயிரம் வருஷத்துக்கு முன்னாடி இந்து மத கடவுள்களை பத்தி கேவலமா ஆபாசமா கதை எழுதி அத புராணங்கள்னு நம்பவெச்சி இந்து மதத்தைக் கெடுத்து வெச்சதே இந்தத் திமுக-தான். 4 வர்ணத்தை பிரிக்கச் சொல்லி பொறப்புலயே ஜாதி ஏற்றத்தாழ்வு கற்பிச்சதும் இந்தத் திமுக-தான். இந்து மதத்தில் இருக்கிற அநியாயங்கள் எல்லாத்துக்கும் காரணமும் இந்த திமுக-தான். வேற யாரும் காரணம் இல்ல. இப்போ இந்துக்களாகிய நீங்கள் என்ன பண்ணனும்னா நான் சொல்றத அப்படியே நம்பனும். உண்மை என்ன ஏதுன்னு எங்கேயும் ஆதாரம் தேடி படிச்சி யோசிக்கக்கூடாது. முருகன் தமிழ் கடவுள்னு சொல்றாங்களே, அப்ப முருகனுக்கு ஏன் சமஸ்கிருதத்தில் மந்திரம் படிக்கிறாங்க? கோயில்ல தமிழ்ல வழிபாடு செய்ய பார்ப்பானுங்க ஏன் எதுக்குறாங்க? பிஜேபி ஏன் மக்கள் பிரச்சினைக்கெல்லாம் போராடாம இந்த மாதிரி விஷயங்கள்ல மட்டும் தூண்டிவிடுது? இப்படியெல்லாம் முட்டாள்தனமா கேள்வியெல்லாம் கேட்கக் கூடாது. என் மேல உங்களுக்கு நம்பிக்கை இருக்குதா இல்லையா? அப்ப, நான் சொல்றதை நம்பித்தான் ஆகணும். இப்ப நான் சொல்றது புரிஞ்சுதா உனக்கு?..."
வழக்கு எல்லாம் போடமாட்டாராம். நேரடியா ஒரே வெட்டுதானாம். கறுப்பர் கூட்டத்திற்கு இயக்குநர் களஞ்சியம் எச்சரிக்கை விடுக்கிறார். எதனால் என்றால் கந்தர் கவசத்தை அவமதித்துவிட்டார்களாம். அதென்ன "கந்தர் கவசம்"? அதன்பேர் "கந்தர் சஷ்டி கவசம்"தானே. ஏன் சஷ்டி என்பதை சொல்ல மறுக்கிறார்? தமிழ் கடவுளுக்கு சஷ்டியை நுழைத்தது யார், ஏன்? இவர்கள் மீதெல்லாம் அண்ணன் கோபப்பட்டால் இன்னும் என்னாகுமோ?
இந்து தர்மம் காப்போம்...!
மேல் ஜாதிகளுக்கு கூழைக்கும்பிடு போடுவோம்...!!
நான் நமது முன்னோர் வழிபாட்டையும் எளிய மக்களின் வழிபாட்டையும் மதிக்கிறேன். இதுகூட அவர்கள் நமக்காக உழைத்துவிட்டுச் சென்றவர்கள் என்ற நன்றிக் கடன் பொருட்டுதான்; அவர்கள் நம்மைக் காப்பார்கள் என்ற நம்பிக்கையில் அல்ல. கடவுளின் பேரால் அரசியல் செய்கிறவர்களை எதிர்க்கிறேன். நம்பிக்கைகளில் எந்தப் புனிதமும் எனக்கில்லை. இயற்கையின் மர்மங்களை இயன்றவரையில் அறிந்துகொள்ள ஆர்வம் கொள்கிறேன். இயற்கையைப் புரிந்துகொள்ள மதங்கள் அறிவுக்கு இடையூறு. இயற்கை யாரையும் நட்போ பகையோ பாராட்டுவதில்லை. அது மனிதர்களைப் பொருட்படுத்தவில்லை. இன்னும் 2000 வருடம் கழித்து பிறக்கப்போகும் மனிதர்களையும் இந்த மந்திரங்கள்தான் காப்பாற்றும் என்று சொல்வதும் நம்புவதும் மிக வேடிக்கையானது. இயற்கையின் புரியாத மர்மங்களால் கடவுள் கருத்து ஆழமாய் உயிர்பெறுகிறது. அதற்கும் உங்களுக்கு நேரடித் தொடர்புகொள்ள ஏதும் தடையில்லை. யார் உதவியும் தேவையுமில்லை. அதன்பேரால் ஏமாற்றும் சுரண்டலும் நடக்கிறபோது எதிர்ப்பதில் யாருக்கு என்ன பிரச்சினை?
15.07.2020
கோயிலில் கொலை செய்யலாம். காமலீலை புரியலாம். அனுராதா ரமணனை படுக்கைக்கு அழைக்கலாம். தமிழ்த்தாய் வாழ்த்தை அவமதிக்கலாம். சிதம்பரம் கோயிலில் பெரிய புராணத்தை தமிழில் பாடினால் உதைக்கலாம். கும்பிட வரும் பெண்களை கன்னத்தில் ஓங்கி அடிக்கலாம். தமிழர் கடவுள்கள் மீது பல ஒழுக்கமற்ற கதைகள் பூசி வேறு கடவுளாக்கலாம். கருவறைக்குள் யாரும் வரக்கூடாது என்று வழக்காடலாம். வசதிக்கேற்ப அர்ச்சனைச் சீட்டு விற்கலாம். சிறப்புக் கட்டணம் என கோயிலில் வணிகம் செய்யலாம். ஜாதிதான் மதத்தின் பலம் எனப் பேசிப்பேசி ஜாதிப்படிநிலை நீர்த்துப் போகாதபடி கட்டிக்காக்கலாம். தமிழில் குடமுழுக்கு கூடாது என்று திமிராகப் பேசலாம். இதைப்பற்றி எல்லாம் எங்களுக்கு அக்கறையில்லை.
மதம் வேறு...
மதவெறி வேறு...
இது விளங்காத குழப்பவாதிகளும் அரசியல் ஆதாயவாதிகளும்தான் விமர்சனங்களுக்கு அஞ்சுகிறார்கள். உண்மை இருக்கிறவர்கள் விமர்சனங்களை கண்டுகொள்ள மாட்டார்கள். சரியான விளக்கம் கொடுப்பார்கள். மத ஜாதி அமைப்புகள் நடத்திக்கொண்டு கடவுளுக்கு குடை பிடிப்பவர்களை மட்டும் சற்று அமைதியாகக் கவனித்துப் பாருங்கள், ஒரு எளிய உண்மை புரியவரும்.
நீங்கள் இந்துவாக இருக்கலாம். கடவுளை வணங்கலாம். இது உங்கள் உரிமை. ஆனால் கடவுள் என்றால் ஏதோ எளிய மனிதனால் நெருங்க இயலாத விஷயம் போல் அதை பூதாகாரப்படுத்தியும் மந்திரம் பூஜை சடங்கு என்று பயங்காட்டியும் பாமர மக்களை தொடர்ந்து அதிலிருந்து அந்நியப்படுத்தி சிலர் வைத்திருப்பதையும் அறிவுள்ள ஒருவர் எப்படி விமர்சிக்காமல் கடந்துபோக இயலும்? ஒன்றை விமர்சிக்கும்போதுதான் அதைக்கடந்து நீங்கள் இன்னுமுள்ள மெய்யை நெருங்கிச் செல்ல வழி ஏற்படும். பொய்கள் இருந்தால் உடையட்டும். இதில் நமக்கென்ன நட்டம். யாரோ ஒருவர் விமர்சித்துவிட்டால் வீழ்ந்துவிடும் அளவுக்கா மதம் பலவீனமாக இருக்கிறது? விமர்சனங்களை அனுமதித்தால்தான் வளர்ச்சியும் மாற்றமும். இஸ்லாம் இப்படி விமர்சனத்தை ஏற்றுக்கொண்டிருந்தால் உலகின் பலமூளையில் வாழும் மக்கள் இன்னும் மாற்றத்தை அனுபவித்திருப்பார்கள்.
14.07.2020
