வெளிப்படைத்தன்மை தேவை

அரசின் இந்த முடிவை காலசூழல் கருதி வரவேற்கும் வேளையில், சில கேள்விகளும் எழுகிறது.

அரையாண்டுத் தேர்வில் தேர்ச்சி பெறாத மாணவர்களுக்கும், விடுமுறை எடுத்த மாணவர்களுக்கும் தேர்ச்சிக்கான குறைந்தபட்ச மதிப்பெண் வழங்கப்படக்கூடும். ஆனால், பொதுவாக அரையாண்டுத் தேர்வு எழுதப்பட்ட தாள்களை எந்தப் பள்ளியிலும் ஆவணப்படுத்தி வைப்பதில்லை. விடைத்தாள்கள் பெரும்பாலும் மாணவர்களிடமே வழங்கப்பட்டுவிடும். இதை எப்படி ஆவணப்படுத்தியிருப்பார்கள்? அப்படியே ஆவணப்படுத்தி இருந்தாலும் ஒரு தலைமையாசிரியர் நினைத்தால் வேண்டப்பட்ட யாருக்கேனும் எவ்வளவு மதிப்பேனும் வழங்க இயலும். இதைக் கண்காணிக்க கல்வி அலுவலகங்கள் உடனடியாக விதிமுறைகள் வகுத்து செயல்படுத்த வேண்டும். இதுதொடர்பான செயல்பாடுகள் வெளிப்படைத்தன்மையாக நடந்தால் நல்லது. அப்போதுதான் இந்தாண்டு படித்த 10 -ம் வகுப்பு மாணவர்களின் மதிப்பெண்கள் மீது நம்பிக்கை பிறக்கும். இதில் ஏதேனும் குழப்பங்களோ அல்லது முறைகேடுகளோ வெளியானால் உண்மையிலேயே அதிக மதிப்பெண்கள் எடுத்த அனைத்து மாணவர்களின் மீதும் ஐயம் எழ வாய்ப்பு உண்டாகிவிடும்.

10.06.2020