எனது பார்வை

வெள்ளையனிடமிருந்து மேல் ஜாதிக்காரர்களுக்கு அதிகாரம் வந்தது. தனித்தமிழ்நாடு உருவானால் யாரிடம் அதிகாரம் போகும்? அதிகாரத்தைக் கைப்பற்றும் நிலையில் நம் சமூகம் சகல சிந்தனையிலும் முன்னேறிவிட்டதா?

மீண்டும் ஒரு அடிமைப் போரை நாம் நடத்தவேண்டியிருக்கும். தலைமுறைதோறும் இது வேலையல்ல. தலைமுறைதோறும் போராடிச் சாவதுதான் வலுவற்ற மக்களின் தலையெழுத்தா?

உணர்ச்சிவசப்பட்டு பட்டு தமிழன் விவேகத்தை இழக்கிறான். உணர்ச்சியூட்டப்பட்ட பிராணிகளாக வாழ்வது புரட்சியில்லை. அறிவூட்டப்பட்ட மனிதனாய் இருப்பதே. அதுவே காலந்தோறும் ஒரு இனத்தை மீண்டும் அடிமையுறாமல் காப்பாற்றும்.

எல்லாருடைய கருத்துக்களையும் விடவும், முன்னோர் சொன்னதைவிடவும் சிந்திக்கிற நம் அறிவு பெரிது.

எல்லோரும் சமம், எல்லோரும் தமிழர் என்ற நிலை ஆழ்ந்த படிப்பும் சிந்தனையினாலே மட்டுமே வரும். அதை உருவாக்கி அறிவியல் பார்வை கொண்ட சமூகமாக நாம் தன்னிறைவடையும் வரையில், தனித்தமிழ்நாடு அடைவது என்பது பெரும் இன அழிப்பிலேயே போய் முடியும். அடைந்தாலும் இதே முட்டாள்த்தனம் நீடிக்கப்போகும் நிலையெனில் எங்கு வாழ்ந்தால் என்ன?

சகல கருத்துக்களையும் உள்வாங்கிப் படியுங்கள். சொந்த சுய அறிவில் பகுத்து ஆராய்ந்து எதையும் ஏற்றுக்கொள்ளுங்கள்.

அறியாமையிலிருந்து விடுபடுவதே மானுட சமூகத்தின் உண்மை விடுதலை.

எல்லா இனத்தையும் பகைபாராட்டாமல் அரவணைத்து ஒரு முன்னுதாரணமான இனமாக; இயற்கையின் தோழர்களாக வாழ எங்கிருந்தாலும் அறிவைத்தேடுங்கள். ஆளுமையை வளர்த்துக்கொள்ளுங்கள். இன்னொருவர் சொல்வதாலேயே எதையும் புறந்தள்ளாதீர்.

புத்தன், ஓஷோ, மார்க்ஸ், பெரியார், அம்பேத்கர், லெனின், மாவோ,  இங்கர்சால் & இன்னபிற எல்லா மானுட சமூக சிந்தனையாளர்களையும் படியுங்கள். அறிவுக்கு ஒத்துவந்தால் ஏற்றுக்கொள்ளுங்கள்; ஒத்துவரவில்லையானால் புறந்தள்ளுங்கள். எதுவும் உங்கள் சுய தெளிவால் பிறக்கட்டும்.

இதுதான் என் பார்வை.