கண்ணன் பிறந்தான் எங்கள் கண்ணன் பிறந்தான்

இவன் கடவுளல்ல
முல்லைத்திணை மனிதன்

ஏய்க்கும் கூட்டத்திற்கு
மேய்க்கும் கூட்டம் அடிமை ஆக
கடவுளாக்கப்பட்டவன்

பிறந்தான் இறந்தான்
எனினும்
பிறந்தநாள் மட்டுமே கொண்டாடப்படுவதில்
அடங்கியிருக்கிறது சூட்சுமம்

அன்று
இடையர் கூட்டத்தின் வேலியாய் நின்று
இன்று
தன்னையே எல்லையாய் சுருக்கிய பிம்பம்

ராமன் தற்கொலை செய்து மாண்டதும்
வேடனின் அம்பால் கிருஷ்ணன் மாண்டதும்
தெரியாமலே போகிறது தலைமுறைதோறும்

"தானே படைத்தாலும்கூட
தன்னால் எதையும் மாற்ற இயலாது"

இப்படிச் சொன்னவனுக்கு
பிறந்தநாள் மட்டும் உண்டு
இறந்தநாள் மட்டும் இல்லையென்றால்
இயற்கை அவமதிப்பன்றோ..!

அவரவர் சுயசிந்தனையை
தொந்தரவின்றி வளர்க்க
இனி
இறந்தநாளையும் கொண்டாடுவோம்
எல்லா கடவுளுக்கும்.