ஜல்லிக்கட்டு - இளைஞர்கள் கூடல்

ஜல்லிக்கட்டு வேண்டும் என மெரினாவில் கூடியவர்களை பலரும் பகடி செய்கிறார்கள். 

இவ்வாறான பார்வையும் பகடிகளும் எக்கருத்தையும் யாரிடமும் கொண்டு சேர்க்காது. 

இனிமேல் இதற்கெல்லாமும் ஒன்றிணையுங்கள் என்று அழையுங்கள். அதற்கான வேலைத்திட்டம் நடத்துங்கள். 

ஏதும் பிரச்சினை வராது என்று தெரிந்துதான் இப்படி கூடுகிறார்கள். அப்படி பிரச்சினை வரும் என நினைப்பதற்கு அவர்கள் வருவதில்லை. இவ்வளவுதான். இதற்குக் காரணம் அறியாமை.

அறியாமையில் இருக்கும் மக்களைக் குற்றம் சாட்டுவதால் பயனில்லை. இது அம்பேத்கரியப் பார்வை இல்லை. 

உங்கள் நியாயத்தை அவர்கள் ஏற்க தடையாக இருப்பதை ஒழிப்பதை நோக்கியே செயல்படுங்கள். 

பாதிப்புக்கு உள்ளாகுபவர்களையே நம்மால் ஓரணியிலோ அல்லது ஒரு பேரணியாகவோ திரட்ட இயலவில்லை என்பதை கவனிக்கவும். 

வெறுப்பான பார்வையை; அணுகுமுறையை மாற்றி உங்கள் கருத்தின்பால் ஆவல் கொள்ள வையுங்கள். நியாயத்தை புரிய வையுங்கள். 

எல்லோரும் ஜாதி வெறியர்களல்ல. ஜாதி வெறியர்களை மட்டும் அவர்களிடமிருந்து தனிமைப்படுத்துங்கள். மற்றவரோடு நட்பு பாராட்டுங்கள். எல்லோரையும் குற்றவாளியாக சித்தரித்தால் யாரும் எப்போதும் எவருடைய அறைகூவலையும் பொருட்படுத்த மாட்டார்கள். இது, அவர்களின் அறியாமையையே அவர்களிடம் நியாயப்படுத்தும் வலுப்படுத்தும். 

இயல்பிலேயே தீவிர வலதுசாரிகளாக வளர்க்கப்படும் அவர்களுக்கு தானாய் எல்லா நியாயங்களும் புரிய வாய்ப்பில்லைதான். அவர்களின் மூளையில் உங்கள் நியாயத்தை விடவும் எதிர்க்கருத்து பலமாய் விதைக்கப்பட்டுள்ளது. ஒரு வங்கிப் படிவத்தைக்கூட முழுமையாய் சரியாய் ஐயமின்றி நிரப்ப முடியாத கல்வி அவர்களுடையது. இருக்கும் தலைமைகளின்பால் ஏற்படும் வெறுப்பு அவர்களை போராடத் தூண்டவில்லை என்றும் இருக்கலாம். ஏதோ அத்தி பூத்தாற்போல் இப்போதுதான் வந்திருக்கிறார்கள். இது தொடர ஆவன செய்ய விழைவோம்.

இது என் கருத்து மட்டும்தான். ஏற்பதும் மறுப்பதும் தங்கள் உரிமை. 

நன்றி தோழர்...