போராட்டம் பரவாதது ஏன்?

சமீபமாக தமிழகத்தில் போராடுபவர்களை திட்டமிட்டு கடுமையாகத் தாக்குகிறது காவல்துறை. நேற்றுகூட மதுரையில் பணத்தட்டுப்பாட்டை சரிசெய்யக் கோரி மத்திய அரசை எதிர்த்து போராடிய "ஜ.மா.ச" பெண்கள் அமைப்பில் காவல்துறையால் தாக்கப்பட்ட ஒருவர் கவலைக்கிடம். 

அதற்கு முன் நாள் சென்னை பள்ளிக்கரணையில் போராடிய "ஜ.வா.ச" -ன் 30 பேரில் 14 பேர் மட்டும் தனியாகக் கூட்டிச் செல்லப்பட்டு மிகக் கடுமையாக தாக்கப்பட்டுள்ளனர். 

இச்செய்திகளின் மூலம் போராட வருபவர்களை எச்சரிக்கிறது காவல்துறை. 

முன்னாள் மக்கள் முதல்வர் ஜெ. மரணத்திற்காக 500-க்கும் மேற்பட்டோர் அதிர்ச்சியில் இறந்தார்களாம். உடனடியாக ஆளுக்கு 3 லட்சம் அறிவித்தார்கள். 

விவசாயிகள் அநாதைகளாக நிற்கிறார்கள். இதுவரையில் சுமார் 84 பேர்கள் வறட்சியால் இறந்துள்ளனர். ஆய்வு செய்ய உத்தரவு போட்டிருக்கிறார்கள். ஆனால் இவர்கள் நடவடிக்கை எடுக்கும் முன்னர் எத்தனைப்பேர் இறப்பார்களோ?...

ஜாதி, ஒரே ஊர் மக்களையே பகையாளியாகவே இருக்க வைக்கிறது. பாமர விவசாயிகள் ஒன்று சேர்வதையும் கிராமங்களில் தடுத்து வைத்திருக்கிறது. தன் ஜாதி தலைவனே தனக்கு மோட்சம் கொடுப்பான் என்று நம்ப வைத்திருக்கிறது. படித்தவர்களும் இதில் சிக்கிவிடுகிறார்கள். 

மக்கள் அருகருகே வாழ்ந்தாலும் தங்களுக்குள் தொடர்பற்று வாழ்கிறார்கள்.

எல்லா ஜாதிகளும் மதங்களும் பொதுமக்களுக்கிடையிலான நட்பையும் தொடர்பையும் அறுத்து சிந்தனையளவில் அவர்கள் ஒன்று சேராதபடி கூறுபோட்டு பெரும் இடைவெளியோடு வைத்திருப்பதால் எந்தவொரு அநீதிக்கும் எதிராக ஒருமித்த மக்கள் எழுச்சிக்கு இந்த மண்ணில் என்றைக்குமே வாய்ப்பில்லாமல் இருக்கிறது. 

தேர்தல் ஆதாயம் கருதாத இடதுசாரி சிந்தனை இளைஞர்கள் பெருகினால் மாற்றங்கள் சாத்தியம்.